Хронограф 1512 года:

Лета] 699[5] месяца сентября в 21 день, в 7 час нощи, родися великому князю Ивану Васильевичю сын Семион. Тое же весны апреля в 11 день отпустил князь великий Иван Васильевичь всея Руси воевод своих х Казани; князя Данила Дмитриевича Холмского, да князя Александра Васильивича Оболеньского, да князя Семена Романовича, да князя Семена Ивановича Ряполовьского, в четверг великий; а царя Махметя-Аминя Казаньского отпусьтил князь велики на другой неделе по велице дни, во вторник, апреля 24-го. А пришли воеводы с силами под город под Казань месяца маия во 18 день, в четверг, на пятой неделе по велице дни. И взяша город Казань июля в 9 день и царя Алегама Казаньского изымаша с материю и сь его царицею и с двема браты и с сестрою и сь его князми. Того же лета, июля 24, прииде весть великому князю, что город Казань взяли его воеводы, а пригонил с тою вестью князь Феодор Хрипун Ряполовьской. И князь велики Иван Васильевичь царя Махметяминя из своее руки посадил на царство в Казани, а коромольных князей и уланов полоненых казаньских смертию казнил и иных коромолников; а царя Алегама князь великий с царицею послал в заточение на Вологду, а матерь его и братию и сестру послал князь велики в заточение на Белоозеро в Карголом. Того же лета повелением великого князя Ивана Васильевича всея Руси основал полату велику Марко Фрязин на великого князя дворе, где терем стоял. Того же лета свершил Марко Фрязин стрелницу на угле вниз по Москве, Беклемишевскую